في يوم ميلادي " السادس والعشرين "

كل سنة وانا زي ما انا...  فكرت أقول اية لنفسي في يوم ميلادي السادس والعشرين :) لقتني بقول .. كل سنة وأنا زي ما أنا.

  وجه في بالي شعر بالعامية للرائع  "علي سلامة "

 اللي بتقول

 “ناقص حته وكل ما أوزن ألاقي لسه ناقصلي حته أحط حته تقل حته وأجيب قميص تضيع چاكته وأعيش لي ساعة يفوتني سته وكل ما أوزن ألاقي ناقص أقول بناقص لو هي حته أتاري لسه ولسه تاخد سنين وحته وحاجات تسيبني وحاجات تاخدني لحاجات تخبط في كل حته وأقول ها نفرح ف يوم ها نفرح ويوم مانفرح علي الله يفضل في القلب حته " تنهيييييييييييييده كبيرة اووووووووي :)

 كل يوم ميلاد بيمر عليا من السنة للسنة مبيبقاش مجرد يوم وبيعدي مش علشان تهنئة ممكن اسمعها من حد ولا هدية جميلة ممكن اتهادي بيها .. بالعكس السنة دي المرة الاولي اللي بحتفل بيوم ميلادي لوحدي انا وبس من غير أي حد غير المقربين مني اوي . والسنة دي كمان احساسي بيها مش زي أي سنة عدت عليا يمكن لان حققت فيها جزء من حلم كبير نفسي احققه وربنا وفقني في اول خطوات ليه .

 حاسة اني السنة دي هتحدد لي حاجات كتير جاية ده لو كان يعني في سنين جاية .  اتعلمت حاجات كتير أوي من السنة دي ان مش لازم الانسان يستعجل الايام لان الحاجات الجميلة بتيجي دايما في وقتها .

 واتعلمت كمان ان مش معني ان كل اللي حواليا ماشيين عكسي ان انا غلط .

واتعلمت ان مترددش واكمل حتي لو بقيت وحيدة اهون بكتير ان أعيش عكس نفسي علشان أرضي غيري .

 اكتشفت ان الوحده دي مش زي ما بيقولوا عليها ومش زي ما انا كنت فاكرة انها موت لاء دي حياة .. أيوة حـــــيــــــاة حياة لكل حاجة للقلب .. والعقل .. والروح كمان . واتعلمت كمان ان مرميش اللوم علي أي حد وان المسئول عن أي حاجة ممكن أفشل فيها هو انــا أنا المسئولة عن أي حاجة حصلت في حياتي ومسئولة عن أي حاجة 

هتحصل في حياتي .

 اتعلمت ان أنـــام كل يوم وانا جوايا إحساس ان أنا عملت اللي عليا أو اللي المفروض أن أعمله .

 الحاجة الوحيدة اللي بحد حزينة عليها في السنة دي هو اني فقدت انسان عزيز أوي عليا ... ربنا يرحمه

 الحمد لله انا حاسة اني راضية وربنا كمان راضي عني ودي الحاجة الوحيدة اللي بتقويني دايما مهما واجهت في حياتي احساسي بوجود ربنا جانبي وحواليا .

يــــــــــــا رب إنـــــزَع مــــن قَلبــــــي تــــلك الآشيـــاَء التـــي تُؤلمنـــي فقـــد خــــابَ الظّــــن بالكثيــــر !!! و الظّــــن بـــــكَ لا يخيـــــب . 

 صلي ........سامح........حِـب.......صحة .....فرحة........امل .... سلام

وكــــــل ســـــنـــــه وأنــــــا زي مــا أنـــــــا