يعني اية أزمة رجالة

يعني إية أزمة رجالة ...

قررت اكتب عن أزمة رجالة لما صادفت انهاردة وزميلة حكت موقف حصل معاها

احنا فعلا بقينا في أزمة رجالة .. وطبعاااااااااا كالعادة انا مش بعمم انا بتكلم عن فئة معينة وليس الكل

ربنا لما ذكر الرجل في القرأن قال " الرجال قوامون علي النساء "

يعني ربنا قال " الــــرجــــال " مقلش الذكور ربنا حدد لنا الصفة محددش النوع والقوام هو القائم علي التدبير والمصالح

وفي كمان مقولة بتقول " ليس كل ذكر رجل "

وانا متفقة جداااااااا مع المقولة دي

بس بردوة زي ما قلت علي الرجال كدة الكلام بينطبق علي النساء ربنا قال " النـــســـاء " مقلش الإناث يعني بردوة محددش النوع حدد الصفة

فالراجل راجل والست ست بس للاسف حصل تبادل للادوار بقت الست هي الرجل والست في وقت واحد وانا بردوة مش بعمم ومع كل احترامي للرجالة المحترمة

ربنا سبحانه وتعالي كرم الست اوي انة جعلها زي الجوهرة ووحدها يعني خلاها ترتبط وتتزوج برجل واحد

والشيخ الشعراوي رحمة الله علية اكد ان قوامة الرجل مش للزوجة بس دي قال انها لاهل بيته من النساء اللي هي امه واخته والعمة والابنه والخالة

بس للاسف بقا في أزمة رجالة فعلا

لما الستات تطلع بولادهم علي كتفهم علشان يمدوا ايديهم يبقا في ازمة رجالة

لما اكون في اي وسيلة مواصلات والاقي مسن او عجوز او مريض واقف واقوم انا علشان اقعدة مكاني وفي واحد قاعد كان المفروض يعمل كدة يبقا في أزمة رجالة

لما تخرج الست تشتغل والزوج نايم مرتاح في بيته يبقا في أزمة رجالة

لما يتساوي طابور الستات في طابور العيش او طابور اي مصلحة حكومية ويمكن أكتر كمان من طابور الرجالة يبقا في أزمة رجالة

لما يرفض يصرف علي ولادة وعلي بيته يبقا في أزمة رجالة

لما يظلم زوجته وميعدلش بينها وبين والدته يبقا في أزمة رجالة

لما تقابل مسنين بيبيعوا مناديل يبقا في أزمة رجالة

للاسف ادوار كتير اتلخبطت ومفاهيم كتير اتغيرت

لا الرجل بقا رجل

ولا الست بقت ست

حتي الأطفال مبقوش اطفال

لازم نعترف الاول اننا فعلا في ازمة وفي مشكلة ولازم يكون لها حل

عجبني الكاتب ايهاب عبد السلام لما اتكلم عن المشكلة دي وحط لها حل من عندة قال فية ان لازم يكون في مادة اسمها " الرجولة " وتدرس في المدارس وتكون مقررة في جميع المراحل بتقدم للطلبة معني الرجولة واسسها ونماذج منها في الاسلام ومجموعة من القصص والشعراء وسير الأبطال والنبلاء اللي بينطبق عليها كلمه رجاال وكانوا قدوة لغيرهم في الرجولة

اكد الكاتب علي فكرته من الناحية التربوية والاجتماعية وحاول ربطها بالعلوم الاخري المهم ان كلمة الرجولة تتردد علي مسامعهم وهم بيبنوا شخصيتهم واكد ان اكيد هما هيكونوا حريصين علي الحصول علي اعلي الدرجات في المادة دي بالذات لان مينفعش حد يرسب في الرجولة ومفيش مانع كمان ان البنات يجيبوا درجات عالية في مادة الرجولة ما هما اللي هيشاركوا الرجال في حياتهم ان شاء الله